ਦੇਹਰਾਦੂਨ – ਅਕਸਰ ਲੋਕ ਆਪਣੇ ਖਾਣ-ਪੀਣ ਨੂੰ ਹਲਕੇ ਵਿੱਚ ਲੈਂਦੇ ਹਨ, ਪਰ ਕਈ ਵਾਰ ਇਹ ਆਦਤ ਹੀ ਵੱਡੀ ਬਿਮਾਰੀ ਦਾ ਕਾਰਨ ਬਣ ਜਾਂਦੀ ਹੈ। ਉੱਤਰਾਖੰਡ ਦੀ ਰਾਜਧਾਨੀ ਦੇਹਰਾਦੂਨ ਦੇ ਆਯੁਰਵੈਦਿਕ ਵਿਦਵਾਨ ਡਾ. ਸਿਰਾਜ ਸਿੱਦੀਕੀ ਨੇ ਚੇਤਾਵਨੀ ਦਿੰਦਿਆਂ ਕਿਹਾ ਹੈ ਕਿ ਜੇਕਰ ਕਿਸੇ ਵਿਅਕਤੀ ਦੇ ਪੈਰਾਂ ਦੀਆਂ ਉਂਗਲੀਆਂ ਲਾਲ ਹੋਣ ਲੱਗਣ, ਸੋਜ ਆਉਣ ਜਾਂ ਦਰਦ ਸ਼ੁਰੂ ਹੋ ਜਾਵੇ, ਤਾਂ ਇਸਨੂੰ ਕਦੇ ਵੀ ਨਜ਼ਰਅੰਦਾਜ਼ ਨਾ ਕੀਤਾ ਜਾਵੇ। ਇਹ ਅਕਸਰ ਯੂਰਿਕ ਐਸਿਡ ਵਧਣ ਅਤੇ ਗਠੀਏ ਦੀ ਸ਼ੁਰੂਆਤ ਦੇ ਲੱਛਣ ਹੁੰਦੇ ਹਨ।
ਕਿਉਂ ਵਧਦਾ ਹੈ ਯੂਰਿਕ ਐਸਿਡ?
ਡਾ. ਸਿੱਦੀਕੀ ਅਨੁਸਾਰ, ਸਾਡੇ ਸਰੀਰ ਵਿੱਚ ਯੂਰਿਕ ਐਸਿਡ ਉਸ ਵੇਲੇ ਵਧਦਾ ਹੈ ਜਦੋਂ ਅਸੀਂ ਬਹੁਤ ਜ਼ਿਆਦਾ ਪਿਊਰੀਨ ਖੁਰਾਕ ਖਾਂਦੇ ਹਾਂ। ਪਿਊਰੀਨ ਵਾਲੇ ਭੋਜਨ ਸਰੀਰ ਵਿੱਚ ਯੂਰਿਕ ਐਸਿਡ ਦੇ ਕ੍ਰਿਸਟਲ ਬਣਾਉਂਦੇ ਹਨ, ਜੋ ਹੱਥਾਂ ਅਤੇ ਪੈਰਾਂ ਦੇ ਜੋੜਾਂ ਵਿੱਚ ਇਕੱਠੇ ਹੋ ਕੇ ਗੰਢਾਂ ਤਿਆਰ ਕਰਦੇ ਹਨ। ਇਨ੍ਹਾਂ ਗੰਢਾਂ ਕਰਕੇ ਤੀਖ਼ਾ ਦਰਦ, ਸੋਜ ਅਤੇ ਚੱਲਣ-ਫਿਰਣ ਵਿੱਚ ਮੁਸ਼ਕਲ ਹੋਣ ਲੱਗਦੀ ਹੈ, ਜਿਸਨੂੰ ਆਮ ਤੌਰ ‘ਤੇ ਗਠੀਆ (Gout) ਕਿਹਾ ਜਾਂਦਾ ਹੈ।
ਕਿਹੜੀਆਂ ਚੀਜ਼ਾਂ ਤੋਂ ਰਹੋ ਦੂਰ
ਮਾਹਿਰਾਂ ਦਾ ਕਹਿਣਾ ਹੈ ਕਿ ਗਠੀਏ ਤੋਂ ਬਚਣ ਲਈ ਖਾਣ-ਪੀਣ ਵਿੱਚ ਬਹੁਤ ਸਾਵਧਾਨੀ ਲੋੜੀਂਦੀ ਹੈ।
ਇਨ੍ਹਾਂ ਚੀਜ਼ਾਂ ਤੋਂ ਪਰਹੇਜ਼ ਕਰੋ:
- ਰਾਜਮਾ ਅਤੇ ਛੋਲੇ
- ਅਰਬੀ, ਬੰਦਗੋਭੀ, ਪਾਲਕ
- ਲਾਲ ਮੀਟ ਅਤੇ ਸਮੁੰਦਰੀ ਖਾਣਾ
- ਕੁਝ ਡੇਅਰੀ ਉਤਪਾਦ
- ਮਟਰ, ਮਸ਼ਰੂਮ, ਬੈਂਗਣ
ਡਾ. ਸਿੱਦੀਕੀ ਕਹਿੰਦੇ ਹਨ ਕਿ ਭਾਵੇਂ ਸਰੀਰ ਨੂੰ ਪ੍ਰੋਟੀਨ ਦੀ ਲੋੜ ਹੁੰਦੀ ਹੈ, ਪਰ ਮਾੜੇ ਪ੍ਰੋਟੀਨ ਵਾਲੀ ਪਿਊਰੀਨ ਖੁਰਾਕ ਸਿਹਤ ਲਈ ਖਤਰਨਾਕ ਸਾਬਤ ਹੋ ਸਕਦੀ ਹੈ।
ਗੁਰਦਿਆਂ ‘ਤੇ ਵੀ ਹੁੰਦਾ ਹੈ ਨੁਕਸਾਨ
ਗਠੀਏ ਦੇ ਨਾਲ-ਨਾਲ ਵਧਦਾ ਯੂਰਿਕ ਐਸਿਡ ਸਿਰਫ਼ ਹੱਡੀਆਂ ਹੀ ਨਹੀਂ, ਸਗੋਂ ਗੁਰਦਿਆਂ ‘ਤੇ ਵੀ ਗੰਭੀਰ ਪ੍ਰਭਾਵ ਪਾਂਦਾ ਹੈ। ਡਾਕਟਰਾਂ ਦੇ ਅਨੁਸਾਰ, ਉੱਤਰਾਖੰਡ ਵਿੱਚ ਗੁਰਦੇ ਦੀ ਪੱਥਰੀ ਦੀ ਸਮੱਸਿਆ ਆਮ ਮਿਲਦੀ ਹੈ, ਜਿਸਦਾ ਮੁੱਖ ਕਾਰਨ ਵੀ ਇਹੀ ਪਿਊਰੀਨ ਖੁਰਾਕ ਹੈ। ਵਧੇ ਹੋਏ ਯੂਰਿਕ ਐਸਿਡ ਕਰਕੇ ਕੰਡੇਦਾਰ ਪੱਥਰੀ ਬਣਦੀ ਹੈ ਜੋ ਕਈ ਵਾਰ ਖੂਨ ਵਗਾਉਣ ਦਾ ਕਾਰਨ ਵੀ ਬਣਦੀ ਹੈ।
ਲੋਕਾਂ ਲਈ ਸਲਾਹ
ਜੇਕਰ ਪੈਰਾਂ ਵਿੱਚ ਲਾਲੀ, ਸੋਜ ਜਾਂ ਦਰਦ ਦੇ ਲੱਛਣ ਦਿਖਾਈ ਦੇਣ, ਤਾਂ ਤੁਰੰਤ ਆਪਣੇ ਭੋਜਨ ਵਿੱਚ ਬਦਲਾਅ ਕਰੋ ਅਤੇ ਡਾਕਟਰੀ ਸਲਾਹ ਲਓ। ਸਮੇਂ ‘ਤੇ ਧਿਆਨ ਨਾ ਦੇਣ ‘ਤੇ ਇਹ ਸਮੱਸਿਆ ਵੱਡੀ ਬਿਮਾਰੀ ਦਾ ਰੂਪ ਧਾਰ ਸਕਦੀ ਹੈ।
