ਅਜਨਾਲਾ – ਪੰਜਾਬ ਦੇ ਅਜਨਾਲਾ ਹਲਕੇ ਦੇ ਪਿੰਡ ਤਲਵੰਡੀ ਰਾਏਦਾਦੂ ਵਿੱਚ ਰਹਿੰਦਾ 8 ਸਾਲਾ ਮਾਸੂਮ ਅਭਿਜੋਤ ਜ਼ਿੰਦਗੀ ਦੀ ਸਭ ਤੋਂ ਵੱਡੀ ਲੜਾਈ ਹਾਰ ਗਿਆ। ਬੱਚਾ ਲੰਮੇ ਸਮੇਂ ਤੋਂ ਕਿਡਨੀ ਦੀ ਗੰਭੀਰ ਬਿਮਾਰੀ ਨਾਲ ਪੀੜਤ ਸੀ ਅਤੇ ਪਿਛਲੇ ਕਈ ਮਹੀਨਿਆਂ ਤੋਂ ਇਲਾਜ ਲਈ ਹਸਪਤਾਲਾਂ ਦੇ ਚੱਕਰ ਲਗਾ ਰਿਹਾ ਸੀ। ਪਰ ਹਾਲੀਆ ਹੜ੍ਹ ਕਾਰਨ ਪਿੰਡ ਵਿੱਚ ਪਾਣੀ ਆ ਜਾਣ ਨਾਲ ਉਸ ਦੇ ਇਲਾਜ ਦੇ ਪ੍ਰਬੰਧ ਟੁੱਟ ਗਏ। ਪਰਿਵਾਰ ਪਾਣੀ ਨਾਲ ਘਿਰਿਆ ਬੇਬਸੀ ਨਾਲ ਆਪਣੇ ਲਾਲ ਨੂੰ ਵੇਖਦਾ ਰਿਹਾ ਪਰ ਕੁਝ ਨਹੀਂ ਕਰ ਸਕਿਆ।
ਜਦੋਂ ਇਹ ਖ਼ਬਰ ਸਰਕਾਰ ਤੱਕ ਪਹੁੰਚੀ ਤਾਂ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੇ ਖੁਦ ਅਭਿਜੋਤ ਦੇ ਇਲਾਜ ਦੀ ਜ਼ਿੰਮੇਵਾਰੀ ਚੁੱਕੀ। ਪੰਜਾਬ ਸਰਕਾਰ, ਖਾਲਸਾ ਏਡ ਅਤੇ ਸਮਾਜ ਸੇਵੀ ਅਦਾਕਾਰ ਸੋਨੂ ਸੂਦ ਦੀ ਮਦਦ ਨਾਲ ਰੈਸਕਿਊ ਟੀਮਾਂ ਤੁਰੰਤ ਪਿੰਡ ਪਹੁੰਚੀਆਂ ਅਤੇ ਬੱਚੇ ਨੂੰ ਸੁਰੱਖਿਅਤ ਤੌਰ ’ਤੇ ਚੰਡੀਗੜ੍ਹ ਪੀ.ਜੀ.ਆਈ. ਹਸਪਤਾਲ ਪਹੁੰਚਾਇਆ ਗਿਆ। ਡਾਕਟਰਾਂ ਦੀ ਟੀਮ ਨੇ ਉਸ ਨੂੰ ਬਚਾਉਣ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ, ਪਰ ਲੰਬੇ ਸਮੇਂ ਤੋਂ ਚੱਲ ਰਹੀ ਬਿਮਾਰੀ ਅਤੇ ਨਾਜੁਕ ਹਾਲਤ ਕਾਰਨ ਅਭਿਜੋਤ ਨੇ ਆਖ਼ਿਰਕਾਰ ਜ਼ਿੰਦਗੀ ਤੋਂ ਹਾਰ ਮੰਨ ਲਈ।
ਬੱਚੇ ਦੀ ਮੌਤ ਨਾਲ ਪਰਿਵਾਰ ‘ਤੇ ਗਮ ਦਾ ਪਹਾੜ ਟੁੱਟ ਪਿਆ ਹੈ। ਮਾਂ ਅਤੇ ਦਾਦੀ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ। ਦਾਦੀ, ਜਿਸ ਨੇ ਹਰੇਕ ਹਸਪਤਾਲ ਵਿੱਚ ਉਸ ਦਾ ਇਲਾਜ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ, ਰੋਂਦਿਆਂ ਕਹਿੰਦੀ ਹੈ, “ਮੇਰਾ ਅਭਿਜੋਤ ਹਰ ਵਾਰ ਘਰ ਜਾਣ ਦੀ ਜ਼ਿਦ ਕਰਦਾ ਸੀ, ਪਰ ਹੁਣ ਉਹ ਸਦਾ ਲਈ ਘਰ ਆ ਗਿਆ… ਚੁੱਪਚਾਪ।” ਇਹ ਸ਼ਬਦ ਪਿੰਡ ਦੇ ਹਰ ਵਾਸੀ ਦੇ ਦਿਲ ਨੂੰ ਚੀਰ ਰਹੇ ਹਨ।
ਸਮਾਜ ਸੇਵੀ ਅਤੇ ਅਦਾਕਾਰ ਸੋਨੂ ਸੂਦ ਨੇ ਵੀ ਇਸ ਦੁੱਖਦਾਈ ਘਟਨਾ ’ਤੇ ਗਹਿਰਾ ਦੁੱਖ ਪ੍ਰਗਟ ਕੀਤਾ ਅਤੇ ਪਰਿਵਾਰ ਨਾਲ ਸੰਵੇਦਨਾ ਜਤਾਈ। ਪਿੰਡ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਅਭਿਜੋਤ ਪਿੰਡ ਦੀਆਂ ਖੁਸ਼ੀਆਂ ਦਾ ਕੇਂਦਰ ਸੀ। ਉਸ ਦੀ ਮਾਸੂਮ ਮੁਸਕਰਾਹਟ ਅਤੇ ਖਿੜਦੀ ਸ਼ਕਲ ਹਰੇਕ ਦੇ ਦਿਲ ਨੂੰ ਛੂਹ ਜਾਂਦੀ ਸੀ। ਉਸ ਦੀ ਅਕਾਲ ਮੌਤ ਨੇ ਪੂਰੇ ਪਿੰਡ ਨੂੰ ਗਮਗੀਨ ਕਰ ਦਿੱਤਾ ਹੈ ਅਤੇ ਹਰ ਕਿਸੇ ਦੀਆਂ ਅੱਖਾਂ ਨਮੀ ਨਾਲ ਭਰ ਗਈਆਂ ਹਨ।
ਇਹ ਘਟਨਾ ਨਾ ਸਿਰਫ਼ ਪਰਿਵਾਰ ਲਈ ਬਲਕਿ ਪਿੰਡ ਵਾਸੀਆਂ ਲਈ ਵੀ ਇੱਕ ਵੱਡਾ ਝਟਕਾ ਹੈ। ਹੜ੍ਹ ਦੇ ਕਾਰਨ ਆਈ ਮੁਸ਼ਕਲਾਂ ਅਤੇ ਬਿਮਾਰੀ ਨਾਲ ਲੜਾਈ ਦੀ ਇਹ ਕਹਾਣੀ ਪ੍ਰਸ਼ਾਸਨ ਲਈ ਵੀ ਇਕ ਸਿੱਖਿਆ ਹੈ ਕਿ ਕਿਵੇਂ ਸੰਕਟ ਦੇ ਸਮੇਂ ਬਚਾਅ ਅਤੇ ਇਲਾਜ ਦੀਆਂ ਸਹੂਲਤਾਂ ਨੂੰ ਹੋਰ ਮਜ਼ਬੂਤ ਬਣਾਉਣ ਦੀ ਲੋੜ ਹੈ, ਤਾਂ ਜੋ ਕਿਸੇ ਹੋਰ ਮਾਸੂਮ ਦੀ ਜ਼ਿੰਦਗੀ ਇਸ ਤਰ੍ਹਾਂ ਖਤਮ ਨਾ ਹੋਵੇ।
