ਮੁੰਬਈ – ਭਾਰਤੀ ਸਿਨੇਮਾ ਦੀ ਦੁਨੀਆ ਵਿੱਚ ਸਾਊਥ ਫਿਲਮ ਇੰਡਸਟਰੀ ਪਿਛਲੇ ਕੁਝ ਸਾਲਾਂ ਤੋਂ ਆਪਣੇ ਵਿਲੱਖਣ ਕਾਂਟੈਂਟ, ਕਹਾਣੀਕਾਰੀਆਂ ਅਤੇ ਸਿਨੇਮੈਟਿਕ ਪ੍ਰੇਜ਼ੈਂਟੇਸ਼ਨ ਲਈ ਜਾਣੀ ਜਾ ਰਹੀ ਹੈ। ਇਨ੍ਹਾਂ ਫਿਲਮਾਂ ਨੇ ਨਾ ਸਿਰਫ਼ ਦੇਸ਼ ਭਰ ਵਿੱਚ, ਸਗੋਂ ਅੰਤਰਰਾਸ਼ਟਰੀ ਪੱਧਰ ‘ਤੇ ਵੀ ਦਰਸ਼ਕਾਂ ਦੇ ਦਿਲ ਜਿੱਤੇ ਹਨ। ਅਜਿਹੇ ਹੀ ਇੱਕ ਵੱਡੇ ਪ੍ਰੋਜੈਕਟ ‘ਕਾਂਤਾਰਾ: ਚੈਪਟਰ 1’ ਨੂੰ ਲੈ ਕੇ ਦਰਸ਼ਕਾਂ ਵਿਚ ਉਤਸੁਕਤਾ ਚਰਮ ਸੀਮਾ ‘ਤੇ ਹੈ। ਹੋਮਬਲੇ ਫਿਲਮਜ਼ ਦੇ ਇਸ ਮਹੱਤਵਾਕਾਂਖੀ ਪ੍ਰੋਜੈਕਟ ਬਾਰੇ ਜਿਵੇਂ-ਜਿਵੇਂ ਨਵੀਆਂ ਖ਼ਬਰਾਂ ਸਾਹਮਣੇ ਆ ਰਹੀਆਂ ਹਨ, ਫਿਲਮ ਪ੍ਰੇਮੀਆਂ ਦੀ ਬੇਸਬਰੀ ਵਧਦੀ ਜਾ ਰਹੀ ਹੈ।
ਹੁਣ ਇੱਕ ਨਵਾਂ ਤੇ ਦਿਲਚਸਪ ਅਪਡੇਟ ਸਾਹਮਣੇ ਆਇਆ ਹੈ ਜਿਸ ਨੇ ਨਾ ਸਿਰਫ਼ ਸਾਊਥ ਸਿਨੇਮਾ ਦੇ ਪ੍ਰਸ਼ੰਸਕਾਂ ਨੂੰ, ਸਗੋਂ ਪੰਜਾਬੀ ਸੰਗੀਤ ਦੇ ਸ਼ੌਕੀਨਾਂ ਨੂੰ ਵੀ ਖੁਸ਼ ਕਰ ਦਿੱਤਾ ਹੈ। ਮਸ਼ਹੂਰ ਪੰਜਾਬੀ ਗਾਇਕ ਤੇ ਗਲੋਬਲ ਆਈਕਨ ਦਿਲਜੀਤ ਦੋਸਾਂਝ ਇਸ ਫਿਲਮ ਵਿੱਚ ਆਪਣੀ ਆਵਾਜ਼ ਦੇ ਜਾਦੂ ਨਾਲ ਇੱਕ ਖ਼ਾਸ ਗੀਤ ਨੂੰ ਸ਼ਿੰਗਾਰਨ ਜਾ ਰਹੇ ਹਨ।
ਵੱਡਾ ਸਹਿਯੋਗ – ਪੰਜਾਬੀ ਧੁਨ ਤੇ ਦੱਖਣੀ ਸੱਭਿਆਚਾਰ ਦੀ ਸਾਂਝ
ਜਾਣਕਾਰੀ ਮੁਤਾਬਕ, ਦਿਲਜੀਤ ਦੋਸਾਂਝ ਨੇ ਇਸ ਗੀਤ ਦੀ ਰਿਕਾਰਡਿੰਗ ਮੁੰਬਈ ਦੇ ਅੰਧੇਰੀ ਸਥਿਤ ਪ੍ਰਸਿੱਧ ਵਾਈ.ਆਰ.ਐਫ. ਸਟੂਡੀਓਜ਼ ਵਿੱਚ ਕਰਨ ਵਾਲੇ ਹਨ। ਇਹ ਸਿਰਫ਼ ਇੱਕ ਸੰਗੀਤਕ ਐਂਟਰੀ ਹੀ ਨਹੀਂ, ਸਗੋਂ ਇੱਕ ਐਹੋਜਿਹੀ ਕੋਸ਼ਿਸ਼ ਹੈ ਜਿਸ ਨਾਲ ਉੱਤਰੀ ਤੇ ਦੱਖਣੀ ਭਾਰਤ ਦੀਆਂ ਸੱਭਿਆਚਾਰਕ ਜੜ੍ਹਾਂ ਨੂੰ ਜੋੜਿਆ ਜਾ ਸਕੇ।
ਦਰਅਸਲ, ‘ਕਾਂਤਾਰਾ’ ਫ੍ਰੈਂਚਾਈਜ਼ੀ ਨੇ ਪਹਿਲੇ ਹੀ ਭਾਗ ਵਿੱਚ ਭਾਰਤੀ ਲੋਕਧਾਰਾ ਤੇ ਪੁਰਾਤਨ ਰਿਵਾਇਤਾਂ ਨੂੰ ਇਕ ਵਿਲੱਖਣ ਅੰਦਾਜ਼ ਵਿੱਚ ਸਿਨੇਮਾਈ ਪਰਦੇ ‘ਤੇ ਉਤਾਰ ਕੇ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਛੂਹਿਆ ਸੀ। ਦੂਜੇ ਪਾਸੇ, ਦਿਲਜੀਤ ਦੋਸਾਂਝ ਨੇ ਆਪਣੇ ਗੀਤਾਂ ਅਤੇ ਸੰਗੀਤ ਰਾਹੀਂ ਭਾਰਤੀ ਸੱਭਿਆਚਾਰ ਨੂੰ ਦੁਨੀਆ ਭਰ ਵਿੱਚ ਪਹੁੰਚਾਇਆ ਹੈ। ਉਹ ਸਿਰਫ਼ ਪੰਜਾਬੀ ਸੰਗੀਤ ਦੇ ਪ੍ਰਤੀਕ ਨਹੀਂ ਰਹੇ, ਸਗੋਂ ਗਲੋਬਲ ਪੱਧਰ ‘ਤੇ ਭਾਰਤੀ ਮਿਊਜ਼ਿਕ ਨੂੰ ਨਵੀਂ ਪਹਿਚਾਣ ਦੇਣ ਵਾਲੇ ਕਲਾਕਾਰ ਹਨ। ਇਸ ਤਰ੍ਹਾਂ, ਦੋ ਵੱਡੇ ਸੱਭਿਆਚਾਰਕ ਆਈਕਨਜ਼ ਦਾ ਇਹ ਮਿਲਾਪ ਇੱਕ ਇਤਿਹਾਸਕ ਪਲ ਵਜੋਂ ਦੇਖਿਆ ਜਾ ਰਿਹਾ ਹੈ।
ਰਿਲੀਜ਼ ਦੀਆਂ ਤਿਆਰੀਆਂ – ਕਈ ਭਾਸ਼ਾਵਾਂ ਵਿੱਚ ਪੇਸ਼ਕਸ਼
‘ਕਾਂਤਾਰਾ: ਚੈਪਟਰ 1’ ਨੂੰ ਹੋਮਬਲੇ ਫਿਲਮਜ਼ ਆਪਣੀ ਸਭ ਤੋਂ ਮਹੱਤਵਾਕਾਂਖੀ ਫਿਲਮਾਂ ਵਿੱਚੋਂ ਇੱਕ ਵਜੋਂ ਲੈ ਕੇ ਆ ਰਹੀ ਹੈ। ਇਹ ਫਿਲਮ 2 ਅਕਤੂਬਰ ਨੂੰ ਵਿਸ਼ਵ ਪੱਧਰ ‘ਤੇ ਰਿਲੀਜ਼ ਕੀਤੀ ਜਾਵੇਗੀ ਅਤੇ ਦਰਸ਼ਕਾਂ ਲਈ ਇਸਨੂੰ ਕਈ ਭਾਸ਼ਾਵਾਂ – ਕੰਨੜ, ਹਿੰਦੀ, ਤੇਲਗੂ, ਮਲਿਆਲਮ, ਤਾਮਿਲ, ਬੰਗਾਲੀ ਅਤੇ ਅੰਗਰੇਜ਼ੀ – ਵਿੱਚ ਉਪਲਬਧ ਕਰਵਾਇਆ ਜਾਵੇਗਾ।
ਫੈਨਾਂ ਵਿਚ ਉਤਸ਼ਾਹ
ਇਸ ਖ਼ਬਰ ਦੇ ਸਾਹਮਣੇ ਆਉਂਦੇ ਹੀ ਸਾਊਥ ਸਿਨੇਮਾ ਅਤੇ ਪੰਜਾਬੀ ਸੰਗੀਤ ਦੇ ਪ੍ਰਸ਼ੰਸਕਾਂ ਵਿਚ ਉਤਸ਼ਾਹ ਦੀ ਲਹਿਰ ਦੌੜ ਪਈ ਹੈ। ਦੋਸਾਂਝ ਦੇ ਫੈਨਾਂ ਦਾ ਕਹਿਣਾ ਹੈ ਕਿ ਉਹਨਾਂ ਲਈ ਇਹ ਮਾਣ ਦੀ ਗੱਲ ਹੈ ਕਿ ਉਹਨਾਂ ਦਾ ਮਨਪਸੰਦ ਗਾਇਕ ਹੁਣ ਸਿਰਫ਼ ਪੰਜਾਬੀ ਜਾਂ ਬਾਲੀਵੁੱਡ ਫਿਲਮਾਂ ਤੱਕ ਸੀਮਿਤ ਨਹੀਂ ਰਹੇਗਾ, ਸਗੋਂ ਸਾਊਥ ਸਿਨੇਮਾ ਦੀ ਮਹਾਨ ਫ੍ਰੈਂਚਾਈਜ਼ੀ ਦਾ ਵੀ ਹਿੱਸਾ ਬਣੇਗਾ।
